RO KHAWM CHUNGCHANGA KAN HRIATTUR PAWIMAWHTE

RO KHAWM CHUNGCHANGA HRIAT TUR

.ᅠ

Laldinpuia Tlau, Chief Judicial Magistrate, Mamit.ᅠ

𝗧𝗵𝘂𝗵𝗺𝗮𝗵𝗿𝘂𝗮𝗶 ~ 

Khawvelah hmasawnna a nasat poh leh ro hlutna a pung a, ro buai pawh a tam nge nge thin. Chutiang khawvela kan chen tawh avang chuan tuna kan thusawi tur hi a pawimawh tak zet zet a ni. Tuna kan thusawi tur hian Mizoram chhunga Mizote ro khawm dan kan tin zawn ber ang.

Kan hriat tur pawimawh zualte chu hengte hi a ni.

𝗣𝗮𝗸𝗵𝗮𝘁𝗻𝗮 ~ Tun hma deuh chuan ro khawm chungchang hi Hnam dan (customary law) hmanga kalpui a ni thin a. Tunah chuan, personal law emaw family law emaw hmanga kalpui a ni ta. Customary law leh personal law hi a chhung thu chu a inang vek a ni thei e, a danglamna chu, customary law chu thuneitute dan siam a ni lo a, mipuiin dan nia an pawm tlan hi a ni. Feh kawng hmangin han tehkhin ila. Lal leh a khawnbawl upaten he kawng hi zawh tur ti lo mah se, mi tinin feh kawnga an rin chuan, vantlang kawnga pawm a lo ni ta ang hi a ni. Personal law chu dan siamtute dan siam a ni. Chutiang chuan, tuna Mizote ro khawm dan bu The Mizo Marriage, Divorce and Inheritance of Property Act, 2014 hi Assembly dan siam a ni.

He dan hi Mizo chi peng tawh phawt chuan an hmang thei a. Hnam dang nena innei pawlh an nih chuan, a mipa zawk Mizo ni se, he dan hi an hmang thei bawk.

𝗣𝗮𝗵𝗻𝗶𝗵𝗻𝗮 ~ Ro tih hian khawih chet theih (movable) leh khawih chet theih loh (immovable) a huam a. Dan mit atang chuan, ro tih hian hmuh theih leh khawih theih thil chauh a huam lo a. Hamthatna hrang hrang lo la awm turte pawh a huam vek a ni. Miin pension a la hmuh tur pawh hi ro (property) a ni.

𝗣𝗮𝘁𝗵𝘂𝗺𝗻𝗮 ~ Ro khawm theih dan hi chi hnih a awm a. Kan dan buin ro khawmna chungchanga a dah san ber chu thurochhiah siam a ni. Thurochhiah a awm loha ro inkhawm dan tur chu chipchiar takin a sawi thung a ni.

𝗣𝗮𝗹𝗶𝗻𝗮 ~ Thurochhiah siam dan tur chungchang han sawi ila. Thurochhiah siam turin hengte hi a pawimawh.

(i) Thurochhiah hi eng lai pawhin a siam theih.

(ii) Thurochhiah siamtu chuan ama ro chungah a siam ang.

(iii) Thurochhiah siamtu chu, rilru buai lo leh kum tling tawh a ni tur a ni.

(iv) Thuhretu pahnih tal an awm tur a ni a, thuhretute hi kum tling an ni tur a ni.

(v) Thurochhiah chu, tihluihna emaw vauna emaw riprapna emaw leh bumna hmanga siam a ni tur a ni lo a. Fel lo taka rilru hmin a nih avanga thurochhiah siam pawh thutling a ni lo.

(vi) Thurochhiah siamtu a thih atanga kum 5 liam hma ngeiin thurochhiah chu a dik ngei tih finfiah (probate) tur a ni.

(vii) Probate dilna tur hi civil court a ni a. Ro awmna bialtu court ni loin ro khawm tura hming ziah (legatee) chenna bialtu court a ni tur a ni. Court-in a lo ngaih pawimawh tur chu, dan ang takin thurochhiah hi siam a ni em tih leh thurochhiah hnuhnung ber a ni em tih a ni.

(viii) Thurochhiah hi sawrkarah register (ziah luh) kher a tul lo a, ziak lut duh tan a ziah luh theih thung a ni.

Hetiang hian, ro khawmtu chu thurochhiah hmanga chin fel thin a ni.

𝗣𝗮𝗻𝗴𝗮𝗻𝗮 ~ Thurochhiah a awm loh chuan dan buin a sawi angin ro hi sem fel leh khawm tir thin a ni. Hei hi chu sawi sen a ni lo ang a, tlemte han sawi chhuak ila.

(i) 𝗣𝗮 𝗥𝗼 𝗖𝗵𝘂

(a) a nupui thih san te, a fapa la in dang lo te, a fanu pasal la nei lo ten an insem thei ang.

(b) A nupui emaw, a fapa emaw, a fanu pasal la nei lo emaw tumah an awm tawh lo a nih chuan, a fanu pasal nei tawhin a pa ro an khawm thei ang.

(c) A nupui thih san leh chumi laka a fate atanga ro khawm thei an awm loh chuan, a nupui hmasa laka a fatein an chang thei a. Mahse, engti kawng mahin a nupui hmasa chuan ro a khawm thei lo ang.

(d) A nupui hmasa laka a fate zingah a ro khawm thei tur an awm lo cheu a nih chuan, a sawnin a khawm thei ang.

(e) Sawn nei lo a nih chuan, a pianpui unauten an khawm thei ang.

(ii) Nu ro chu a pasalin a khawm ang a, pasal nei tawh lo a nih chuan, a fate an khawm ang.

(iii) Fanu leh fapa nupui pasal la nei lote ro chu a pain a khawm ang a, pa nei tawh lo an nih chuan a nuin a khawm ang.

(iv) Hemi kaihhnawih thil han sawi belh ila –

(a) Roneitu duh dan anga a thih thlenga amah enkawltu chuan ro khawm turin dinhmun tha ber a luah ang.

(b) Fapa chu nupui nei a ni emaw ni lo emaw, tin, fanu chu pasal nei lo a nihin, eizawnna vanga hmun dang awm an nih chuan indang nia ngaih a ni lo.

(c) Fanu zingah pasal nei kir lehte chu ro khawm chungchangah pasal nei lo anga ngaih a ni.

(d) Ro khawmtu chuan ro a khawm sak-a laka a mawhphurhna hlenin a leibatte a rulh sak ang.

(e) Fanu leh fapa ten an ro chanai an la duh a nih pawhin, nu ber chu nu thianghlim a nih chhung chuan, a chenna in luah leh he inin a ken tel thil dangtea a chanvo chu chhuh sak theih a ni rih lo ang.

𝗣𝗮𝗿𝘂𝗸𝗻𝗮 ~ Ro khawmtu ni turin heirship certificate neih a tul a. Chu chu ro awmna bialtu Civil Court-ah dil thin a ni ngai e. Heirship certificate dil hi court case chi khat a nih angin dan zawm tur a awm ve diah a, kan sawi seng lo ang a. Ukil te rawn theih a ni a. Mizoram State Legal Services Authority emaw district tina Legal Services Authority -te pawh tanpuina dilin pan theih reng a ni e.

𝗔 𝗧𝗹𝗮𝗻𝗴𝗸𝗮𝘄𝗺𝗻𝗮 ~

(i) Kan danin a sawi angin ro khawm dan chi hnih a awm a, pakhat chu thurochhiah hmanga ro khawmtu (legatee) a ni a, pakhat leh chu, danin a sawi anga ro khawmtu (heir) te a ni.

(ii) Ro khawm chungchangah hmeichhia leh mipa te an intluktlang tawh a ni ber e.

(iii) Kan chhungte thi tawh ro khawm nan Court-ah Heirship Certificate kan lak a ngai.

(iv) Thurochhiah hi a siamtu thih atanga kum 5 ral hma ngeiin probate a ngai.

(v) Ro neitute hian kan thih hnua ro buai a awm loh nan thurochhiah siam i uar ang u.

Ka lawm e.

(AIR, Aizawl, date of recording/broadcasting 24.02. 2022)