Credit Card chungchang

CREDIT CARD - I HRE CHIANG ANG U

Ziaktu : Amama Varte

ATM Card kan tih mai ho hi DEBIT Card an ni a, kan Account-a pawisa awm lak chhuahna a ni. CREDIT Card chu kan Bank Ac-a mi ni lo, mamawh huna pawisa lo hman puk tur awmna a ni leh mai.

Bank atangin an rawn phone che a, “Ka pi/ka pu, Credit Card offer i dawng a, lokal la, kan lo buaipui ang che,” an tih khan, lawm viauna tur a awm hran lo. Rawn phone lo che mah se, Credit Card i duh chuan Bank-ah kal la, an lo buaipui ang che. An tehnaah i tlin a, i document a fel fai bawk chuan offer dawng lo pawn a neih theih. An rawn phone che khan thil danga 10% Discount dawn tih ang chi hamthatna special em em a awm chuang lova, mahni thua dil nen a danglamna chu document submit ngai a tlem bik tih leh Approve-na chance a sang bik tih a ni (A thawkte sawi danin). Chuvangin, an phone leh phone loh che ai chuan Credit Card i mamawh leh mamawh loh kha a pawimawh. Credit Card hi kan hriat chian a ngai a, a neisa te pawhin a hman dan kan zir zel a tha awm e.

A tangkaina:

1. Installment: Installment-a thil chah/lei nan a tangkai hle. Online-in thil kan chah nasa tawh a, Credit Card neih chuan tlema thil man to ve deuh pawh Installment-in a chah theih a. Kan mamawh, a hlawma pawisa pek tur neih loh vanga kan lei theih loh kha thla 3 atanga kum 1 chhung vel rulh turin a lei theih a, a tangkai hle. A tihdan la hre lo tan a tawpa Link-ah khuan Video en tur a awm.

2. Pawisa puk:

ᅠ Credit Card kan neih chuan, emergency-a pawisa puk mai tur eng emaw zat kan nei reng tihna a ni a, awlsam takin Loan tenau kan la zung zung thei a ni ber. Mahni inthunun thei lo tan erawh leiba neih a awlsam viau thung. Awmze neia hmang thiam tan chuan Security tha tak a ni a. Pawisa hman mai tur neih loh, Account lama lak tur awm tawh si lo, mamawhna sang tak si-ah te ATM Booth atangin pawisa a puk mai theih a, dam lohna avanga phaia zin etc-ah te pawh, tluan loh leh pawisa tihbo palh thulhah pawh invenna tha tak a ni. Pawisa puk theih zat hi Card azirin a inang lova, a tlangpuiin SBI Card-ah hian Credit Limit Rs. 49,999 vel atanga intanin, tam tham tak thlengin a ni chho a; tin, a hmangtu leh a hman dan azirin a pung chho ve zel thei bawk. Thil chah nan chuan a hman deuh vek theih laiin, a pawisa faia puk theih zat erawh Credit Limit atanga 30% vel a ni tlangpui thung. A aia sang leh hniam deuh te pawh a awm bawk awm e. Tin, pawisa kan puk emaw, Installment-a thil kan lei chuan a pung a awm a, a tlangpuiin SBI Card hmanga installment-a thil chah hian kan thil chah man pumpui atangin 12-14% in a pung a, pawisa fai kan puk hian a tlangpuiin thla tin 2.5-3% in a pung (A pung hian Rs. 300 a zat loh chuan an ti tling thin. A pung hi Rs. 300 aiin a hniam thei lo tihna a nih chu. Tin, a Company/Bank azirin a danglam hret thei bawk ang). Installment ni lem loa thil chah nana hman hrim hrim a nih chuan, a rulh hun tura kan rulh chuan a pung a awm lo thung (Hei pawh Bank/Company azira danglam thei a ni a. SBI Card-ah chuan interest ka chawi ngai lo).

A that lohna: A that lohna han tih hian, Credit Card that lohna ai mahin, a neitu tur lam dinhmun atanga teha neih kher a tul loh dan a ni zawk mah ang.

1. Sum sen thlawnna a ni thei:

ᅠ A tira kan sawi angin, mi thenkhat chu an phone avangin Bank-ah an kal a, a hman dan thiam lo emaw, hmanna tur em em hre lo chungin Credit Card an nei ve tawp a, annual fee (kum khata pawisa chawi) an chawi ve reng tho si a, sum sen thlawnna mai mai a ni thei. Annual fee hi SBI Card-a a tlawm berah Rs. 499 a ni. Chuvangin, thenkhat tan chuan tul lem lova sum senna mai mai a ni thei. Mamawh leh hmang tangkai thiam tan erawh neih ngei atana duhawm tak erawh a ni.

2. Leiba neih: 

ᅠPawisa kan puk emaw, thil lei leh chah nan kan hmang emaw, a hun taka rulh a ngai. A nih loh chuan a pung a tam chak hle. Installment-in thil a chah theih a, awlsam takin pawisa a puk zung zung thei bawk a, mi inthunun thei vak lo tan chuan leiba neih vak emaw, tul lova pawisa hman vak vakna thlentu a ni thei a, fimkhur a tha.

A neih theih dan:

1. Online hmanga dil theih ni mah se, SBI-ah chuan khawpui thlan tur an rawn dahsa zingah Mizorama khua lang a la awm ve loh avangin, Online-a dil chu a la theih ve loh niin a lang a, Bank-ah kal mai a ngai (Bank/Company dangah a theih em ka hre lo thung) Kan Account neihna Bank-ah Adhaar Card, Pan Card leh hetiang lama Document pawimawh kan lek chhuah thinho kha (Ken ngai hi ka hre vek lova, Bank/Company azirin a inang vek lo mai thei bawk) kengin kal ila, Credit Card buaipuitu bik ten tha takin min lo buaipui mai thin a ni. Thenkhatah chuan Bank Statement leh Income Certificate emaw, Last Pay Certificate emaw ken a ngai ve thin bawk.

2. Credit Card nei tur chuan a tlangpuiin thla khatah Rs. 15,000 - 20,000 aia tlemlo la lut thin nih a ngai. (Hei hi Internet lama ka en kual a ni a, Bank/Company hrang hrangah a inang vek lo. A thawk pakhatin a rawn sawi danin, SBI bikah chuan Rs. 25,000 a lo ngai tawh a. Chuti a nih chuan a dang hoah pawh a lo danglam nual mai thei)

Offer chungchangah khian, ka tawn atangin ka sawi a. Mahse, a lo dik tawk lo deuh a. Post ka siamtha a. Mahse, Youtube lam chu a edit/siamthat ve theih si lova, dik tawk lo deuh awm chunga dah reng kha a tha ber lova, ka delete a. Remchangah uluk zawkin, Credit Card leh SBI Ac pangngaia Reward Point en dan leh a hman tangkai dante nen siam that leh kan tum mai dawn nia.