Chu thumal chuan a rilru chu a luah tlut tlut a, a lungphu a ti rang a, awmdan a thiam lo va, engahnge a lo aw ve mai aw tiin a in ngaihtuah a, hmabaka tihtur khirh tak awm, pumpelhna awm se pum pelh a duh ngawih ngawih chu a ni si a. A lo aw lai khan thluak fimlo leh ngaihtuah chiang lovin a aw lo va, thluak fimin, zan lam atanga nguntaka a ngaihtuah hnua a thu tlukna ngei chu a ni tih a hria a, mahse a hreh a ni. Tunah chuan Rina bike thar ver vawr leh fai tak hmangin Durtlang lampanin Greenwood Hospital an tlan pel chho mek chu a ni si a. An tihtum lah an pahniha sawidun tawh atangin a chiang si.
Kum 3 an inkawp tawh a,mizia pawh an inhrechiang tawh hle a. An rinawm dun ve ve a, an lerhlo ve ve bawk a. Hmangaihte inkara thil eng engemawin intihthiamlohna a thlen angte pawh chu an chungah pawh a thlen ve thin ngei a, mahse rilru puitling takin, dawhthei tak chungin an hmachhawn thin a, chu chuan an inhmangaihna leh an inrintawnna te chu a tipung deuh deuh thin a ni.
Rina chu nungchang tha, hleitling leh hmel pawh chhelo tak, hang lam aia ngo lam pawl zawk mah, fit 5.9 a sang, dar pharh hlai hlep hlawp, sam dum hlap mai a ni a. Lehkha a thiam thei a, Civil Service a tlin ngei tuma bei ngar ngar a ni a, a tum ang ngeiin a tling ta a, training turin Mizoram a chhuahsan dawn ta a. Training te a zawh a, hna a vawn fel veleh pumkhata insiam turin thu an thlung fel diam tawh a, an chhungte pawh engkim an hrilh vek tawh hnuah Rina chuan phut a nei ta tlat mai a. Vawi tam an sawidunin an inhnial a, Partei chuan mittui tla zawih zawih chungin a hnial thin a, mahse Rina chuan a thil phut chu a phut tlat bawk si a. “seks hman hi ka chak hrim hrim a ni lo. Mahse ka awmbo dawn a, inhmu zen zen theilo in kan awm dawn a, duhtu che tam tak an awm tih ka hria a, chuvangin nikhat pawh thlamuangin ka awm thei dawnlo. Mihring rilru leh thinlung chu thle sawn zung zung thei a ni a, i laka ngaihngam taka ka awm theihna tur chu engmah a ni lo va, kan remtihna ve ve a seks hman hi a ni,” a ti tlat a. Ngaihngamlo tak chunga a hmangaih Rina thlah liam chu a phal ngang bawk si lo va, chuvangin a aw ve ta ringawt mai a ni.
Aw a pawh hmain Pathian hnenah a tawngtai a, a thinlungah chuan Pathian remtih miahloh a ni tih chiang takin a hria a, chatuan nunna hlohna thil rapthlak lutuk a ni tih a hria a, Rina bulah pawh a sawi thin a, Rina pawhin a pawmpui a, mahse chuvang chuan a thil phut chu a sawhsawn duh chuang si lo. Ngaihzawng te chu a lo nei ve tawh thin a, duh ve deuh pawh a nei tawh, mahse Rina anga a thinlung zawng zawng a pek hi tumah an la awm ngai lo. Hmeichhe tam takin Rina chu an duh a ni tih pawh a hai bik lo, chan (hloh) a hlau a, a hlau satliah a ni lo. A nungchang engkim hre chiang tawkin a inhria a, chuvang chuan a thlah phal tawhlo a ni. Mahse, mahse....
An tlan zel a, mi a hmuh amah rawn entu apiangte chuan, “Saw le, mipa laka inphalrai turin a inphurh tir mek a nih saw,” tih melh hian an melhin a hria a. Durtlang kham te chu a thlir vawng vawng a, amaha engemaw tak chu chatuan atan a thlah liam dawn a ni tih ngaihtuahna amahah a awm a, a tah a chhuak a, a tap ngam bawk si lo. Mihur,mipain an duh duha an chin leh vel ang mai nite hian a inhria a, boralna kawngpui (Highway of death) ah chuan an tlan mek niin a hre bawk a, nidangah chuan Rina kianga a awm chuan him hliah hliahin a in hria a, a lung a awi a, a kim a, a thla a muang a, tunah erawh chuan.....
Rina nena an inneih hnua a awmdan tur a hriat nan lehkhabute a chhiar nasa a,Perfect Woman tih lehkhabu te chu tha hlein a hria a. A pasal tana ngaihzawn awm taka awm reng theih dan turte chu a lo ngaihtuah lawk ve nasa a, seks an hman pawha a pasal lungawi taka siamdan tur chenin a ngaihtuah lawk a ni. Inneih hmaa seks hmandun tur chungchang reng reng a lo la ngaihtuah ngai lova, a ngaihtuah loh chu tunah a tawng dawn chu a ni si a.
Leitan thlen hma motor silna hmun an thleng chho va, a manganna chu a zual tial tial a. Khawilai ramhnuaiah nge Rina chuan a tawmpui dawn a, a thianghlimna chu khawi hmunah nge laksaka a awm dawn a hre lo. Getsemani huana Lalpa lungngaihnate chu tawmpui phaklo mah se, hrethiam pha reih ruaihin a in hre ta hial a. Seks an hman dawna an insawngbawl vel dan turte, an hman lai taka an awmdan tur te chu a ngaihtuah a, ‘a ni theilo,’ tiin a tawng chhuak a, mahse Rina chuan full face helmet a khum avangin a hre lo niin a lang.
Thalaiah Secretary hna a chelh mek a, Thlarau Thianghlima khatin lamtualah vawi tam a lo tul chhuak tawhin, midang chaklo zawk leh thlemna tawkte pawh a lo tanpui tawh thin a, anmahni fuihtu ah vawi tam a tang tawh thin a. Mahse, fuihtu chu fuih ngaiin tunah a awm a, chutiang dinhmunah chuan a ding ang tih reng an Pastor te nen vek ngaihtuah phak reng an awm lo va, amah chu an ring tawk em atin ni.
“Lalpa, i duhloh zawng a ni si a, i remruatna ka nghak a ni,” mittui tla zawih zawih chungin a ti a. Zawitein chu thu chu a sawi chhuak a, amah pawhin a hre chang chang chauh a ni a, mahse a thinlung chu a rum kawk kawk thung si. “Lalpa aia thlan tur dang tunge awm? Chuvangin hetianga sual rapthlak tak tihpui atana amah thlemtu hi a chan(hloh) ngam chuan, a Lalpa chuan midang tha tak a pe tho dawn lawm ni?” tiin a ngaihtuah a, puitu a ngai a, tanpuitu a mamawh a, mahse tumah an awm lo va, amahin, amah maiin a hel tuar mek a ni si.
“I va ngawi ve, engnge i ngaihtuah Parte?”
“Sawi tur a vang em atin ni.”
Durtlang Leitan an thleng a, an hma zawn takah chuan building a lo awm a, chutah chuan MIZORAM RURAL BANK tih inziak lian tak chu Partei chuan a hmu chiah tihah chuan eng thil nge thleng a hrelo. A ri thuai a, leiah a tla a, in nem khalh a tumna a kut veilam chu a thlep hnawp a, chumi hnu reilote ah chuan nikhawhrelovin a awm zui ta a. A han harh leh chuan Durtlang Hospital ah a lo awm tawh a. A kiangah chuan a nu leh pa leh nau te pahnih, a pianpui neih chhun te leh a hmangaih Rina te chu an lo awm a. Thil awmzia a hrethiam lova, mahse a nau Rawna chuan zawitein a hrilh a. A ban veilam chu a tliak a, a bek tlemin a sawh kak bawk a. Taxi nen an insu a lo ni a, taxi driver chu damdawi a rui a, Rina’n side a pe chung pawhin a rawn su ta tho a ni tih leh amah chu an man a ni tih te, Rina chuan a khup dinglamah hliam na vaklo a tuar a, a bak engmah na a neihloh thute a han hriat chuan lawm avangin a mit atangin mittui a lo hnam chhuak a. A nu chuan dim leh duat takin a rawn hruk sak a. “I rin tlakzia i rawn tilang a Lalpa, ka lawm e, ka lawm takmeuh.....” tiin zawitein a phun sep a. A nu chauhlo chuan hre ve dang tumah an awm lo.
Thlahnih a liam tihah chuan a ban chu na pawh a hre tawh lo, x-ray film an en pawhin an zawm fuhin engmah sawisel a nei tawh lo va. A hmangaih Rina chuan a training na tur hmun a panin a training mek a. Nitin sms a rawn thawn thin a. Nikhat chu ti hian sei ang reng tak a rawn thawn a.
“Parte, i laka ka thil phut tihhlawhtlin i hrehzia kha ka hria asin. Keimahah hian rinngamlohna che a awm a, chan(hloh) che hlauhna nasa tak ka nei tlat a. Tichuan sekshman dun a, nau pai tir ngei che a, ka ta ni a, midang tan beisei theihloh tura siam che duhna nasa tak keimahah a awm a. Chumi rual chuan Pathian duhdan a nih lohzia i sawite khan min hneh a, mahse ka thinlungin ka pawm phal si lo. A dawn zanah khan ka tawngtai a, “Lalpa, nangman min dal a nih ngawtloh chuan ka tum hi ka ti tlang dawn a ni. I awm takzet a nih chuan i duhzawng chu thlentir ang che,” tiin ka inhlan a. Remlohna engemaw a awm kha ka beisei a, engmah a awm ta si lo va, tikhan kan inphur a, kan tlan ta zel kha a ni si a. Pathian hi a awm tak taklo a nih dawn hi ka ti hman tawh a. Mahse Taxi in min rawn sut chiah khan, ‘Lalpa, i rintlak....’ tiin ka tawng chhuak asin. ta tang khan ka thinlung a inlamlet daih a, kan innei ngei ang tih rinna keimahah hian a awm a, ka thla a muang a, ka phut nawn leh ngai tawh lovang. Lalpan ka tan min pe tawh che tih ka hria a, amah chu a rintlak tih ka hrechiang bawk a ni,” tiin.
An bathlarah thuin ral lehlam hla tak chu a thlir vang vang a. Rina a hmangaihna chuan a rawn tuam hlup hlup a. A ngaih a zual a.
Hun leh nite hi rial ang ral thuai se,
Chutin e nang nen duhaisam kim nan;
Tawn ni her thuai se tia thlir chung hian,
Chhunni leh zan khua ka hmangral leh thin.
tih chu zawitein a sa a. “Rin, ka hmangaih che. Ka pasal i nih hun tur thlirin chhun ni leh zan khua ka hmangral mek zel a nih hi,” a ti a. Lunglenna leh khawharna chuan chhum ang maiin a rawn zim hnan a, chumi karah chuan hlimna kawl eng pawh chu a thinlung mit chuan hmu bawkin a inhria a.
“I tan rinawmin ka lo awm reng ang Rin. Kan tana tha tur hrechiangtu a awm a, khatianga sual rapthlak tak tih kan tum laka thiam taka min daltu-a kha, a rintlak a ni tih hi i vawng dun zel ang aw,” tiin msg chu mittui nen a type a, a thawn a.
“Ka ngai che Parte.”
“Keipawh Rin,ka kimlo i tello chuan.”
“Mahse...a rintlak tiraw?”
“Nia, chu chuan min hnem.”
“Ka hmangaih che.”
Comments
Post a Comment