Kan pa chuan kei aiin midang aduhzawk miau a, fa pawh nei lo a inthen leh chu ka hreh ve hle a, chuvanga chhel taka awmlui ve tang tang pawh ka ni reng a ni. Mahse, kan inchhung ngeia arawn hruailuh tak ah chuan hnawl zawk na na na chu ka thawmhnaw tlem keng chuan ka chhuak ta nge nge a. Kutbenga thingtlang lama let leh chu ka tum bau lo, ka chanchin chu ka chhungte hrilh pawh ka tum hek lo. Mi nunrawng leh bumhmang ka pasal chet dan chuan ka thluak atibuai zo tawh te pawh ani mahna!
Zan Dar 10:00 a ri tawh, Aizawl khawpui eng uarh hnuaiah chuan ka vak ka vak a, pan tur ka hre chuang lo, hria pawh ni ila pan ka tum chuang lo. Ka luhlul ve hrim hrim chu thu hran, ka rilru na in avawrtawp athlen meuh chuan pawisak ka nei lo ani ber. Motor veivak pawh akhat pharh tawh a, mi chi tin chi tang awmna Aizawl khawpuia zurui chhaihbuaitu ka tawng lo chu ka vanneihna a ni!
'Ui pawh avah avah chuan ek thing atawng nge nge' tih ang deuhin ka hma a nula pahnih rawn phei chu ka lo ngaichang a, ek ngawt ai chuan an laktlak mahna tiin lo biak pawh ka tum a ni! Ka bul an rawn thlen chuan ka biak hmasak reng an ngai lo, min dinchilh in chulai hmun ah chuan engnge ka tih te min zawt a, ka chanchin te chu ka hrilh ta vek a, an hming pawh ka hre ve ta.. Rosy leh Dindini an nia, an fel viau nachhan chu zurim an nam huam vang ah chuan ka puh thla ve ngawt a, mahse anlo fel tak tak a ni. Ka eizawnna kawng min kawhhmuh thlap!
Atawi zawngin sawi ila, an phone no min pek te leh thil tangkai tur min hrilh hmang chuan ka eizawnna bul 'INZAWRH' chu ka tan ta..
Hmelhriat ka nei chak hle a, chutianga mahni inzuara sum han lakluh chu ka hreh viau turah in lo ngai maithei, mahse ka hreh hauh lo! Ka pasal laka phuba ka lak theihna leh a rilru ka tihnat theihna kawng nia ka hriat avang in! Dawr tu pawh ka nei zantin ta mai reng a, sum chu tlachham lo tak ka ni. Ka thiani te nen pawh chuan kan la inpawh viau a, mahse Dindini erawh keini ang in a zalen ve thei lo, achhan chu an veng Ktp hruaitu alo nia!
Nikhat chu thawmhnaw lei tumin bazar ah ka kal a, mi zingah chuan mi pangngai ka ang ve hle in ka hria, ka haw lam chu ka inkhaibawr ve hle mai. Kawng ka kan lai chuan ka lampana Car rawn tlan mek chuan horn ape tuarh a, kan hawiphei chu ka pasal leh anupui thar chu lo niin, hmanhmawh hle lo ila chu vawm zui sawk tak hi ka nap! Thinrim insehruh teuh chung chuan Rosy te in chu ka thleng a, awmna mumal ka nei lo na chu ka awm nuam thei phian, Hotel changkang tak tak ah te riakin achang leh kan Party tlaivar a, rilru nat pawh nei hman lo a ruih reng mai chu anuam ber pakhat a ni.
Rosy chuan "Tete, hei zanin i mikhual tur" tihpah in number pakhat min pe a, "a chhelo teh ania aw" atih zawmzata anui har har bawk a, kei pawn chutianga tlangval chhelo tak te chu mi pa zur ve tawh tak han kuah ai ngawt chuan aphurawm deuh! Phone chuan kan inbe phawt a, chumi zan Dar 10:00 a Hotela inhmu tur chuan kan intiam ta a. Nalh leh itawm thei tur ber chuan ka inchei a, Hotel pawh ka thleng ta, ani pawh reilote ah chuan arawn thleng ve mai a, ahmel chu atha takzet, ahlim hmel nui deuh sang mai te chu hmuh anuam in ahahdam thlak a ni tawp. Ka bul set ah chuan rawn thu in min han bia, kei meuh pawh ka lai ve lek lek a ni. "Tete, ka hming chu Rsa nia i hmeltha hle mai" tih pah chuan anui ver ver a, eng rui hmel mah a pu lo lehnghal! "Nang pawh i hmeltha lawm" kan ti thla ve ngawt a, "i chhuah thu hi i chhungten an hria m?" atih chuan "chhungte ka neilo" ka lo ti bung nghat a, anui sen sen a thu ho te te chu mi zawt chhen bawk a, hmm darkar chanve lai a liam tawh, hepa hi azei vak lo ani maw..ka tih rilruk mek lai chuan sana a en vut a, "Aw..tihtur pawimawh tak ka nei, ka lo theihnghilh der mai, zanin chu min hriatthiam angai, ka kalsan phawt ang che" ati ta mai a. Tawng tuma ka an zuau lai chuan "Hei zanin atan" tiin Rs 3000 chu min pek pahin achhuak zui ta mai a. A chetdan chu mak ka ti hle a mahse pawi lo, atha zawk daih..pawisa ka hmu tho a tiin ngaihtuah zui lem lo chuan haw zai ka rel ta a.
Rsa chuan min rawn be ta fo mai a, inhmuh arawt ang in kan inhmu fo a, ahma ang bawkin engmah min tihpui ngailo a pawisa erawh chu min pe ziah tho! Amah ah chuan zawhna ka ngah hle a, mahse ka zawt ngai miah lo. Pawisa min pek ziah avang chuan zanah pawh ka chhuak ngai ta meuh lo, ka thiante pawh chuan mak an ti a ngaihzawng ka nei anih te an ring a. Mahse Rsa chuan min ngaizawng hauh silo ani!
Tlaikhat chu lenchhuahpui ah min rawn sawm a, ka hnial lo chiang khawp mai hepa hian min aikaih nge mawni ka ngaina phian lehnghal. Kan inhmuh chuan min chibai nan a nui leh ver ver a, a tha chiang thei khawp mai! Titi bawrh bawrh pah chuan kan kal zel a, kawngsir ah chuan kutdawh leh mitdel ho chu anlo intlar diat a, Rsa chuan "hetiang ngawta eitur hmuhchhuah chu an khawngaihthlak ngawt mai" tihpah chuan pawisa chu ape phei den den a, pe ve turin min phut lo, ka tum hek lo! Chutih lai chuan mi pakhat hian mi rawn su per lawp a, thinrim takin "hmela, min hmu nage?" Ka ti vin tuarh a, Rsa chuan "khai..khai, mitdel a nih kha" tiin mi lo khapdai vat a, ka tih thin dan bawkin ka hmui ka ner nang a kan haw ta a..
Thla3 lai avei ta, Rsa chuan min lenchhuahpui fo a, ahmun erawh anuam lem lo, rethei bakberh te te inhlawhna hmunah te, mitdel kutdawh ho awmna hmunah te a ni daih zel, enge ka chungah hian tih atum erawh ka la hrethiam chiah lo! Mahse atir atanga ka zawhna zawng zawng chhanna chu, chumi zana a msg min rawn thawn atang chuan chhanna ka hmu ta.. Zanlai thlenga mu thei lo a ka tal vel lai chuan ka thianpa msg chu alo thleng a, ka han chhiar chuan he thu hi alo inziak..
" I chunga heng zawng zawng ka tihna chhan chu maw, i eizawnna hi bansan la ka duh vang a ni. Khaw eng hmu ve thei lo mitdelte pawhin an tihtheih tawk zaiin an eitur an hmu thei a, mi rethei ber ber te pawhin rim taka hnathawkin ei an hmu ve a sin.. Nang chu fu ke kim leh thluak tha tak i nei a, i taksa zuar kher lo pawhin i eitur chu i hmuh ka ring tlat a ni, atul chuan ka pui zel ang che" tih hi...
Ka chhiar zo chu ka harh hawk a, ka thiltih thin chu Pathian huat zawng ber a ni tih te ka ngaihtuah ta a, "ka ti thei em em ang mi pangngai ka ni a, thianghlim takin ka eitur chu ka thawkchhuak ang" tiin ka rilru chu ka siamfel ta a. Ka zah tak ber chu khang hunlai zawng zawnga zahna chang ka lo hre miah lo kha a ni!! (Thiltha hi chu a sawi a sawi ai chuan a tih a tih hian mi thinlung sak ber pawh a ti nem thin. Miten an thlira an zir chu i nun kha a ni, i nun ah khan zirchhuah tur a awm ve em?
Comments
Post a Comment